Of men het oordeel der overheyt van de ghereformeerde religie in
’t afsetten der dienaren ghebruycken sal?
Is gheantdwoort, dewijle het der christelicker overicheyt ampt is
te besorghen dat men in godsalicheyt ende eerbaerheyt leve
waertoe ghetrouwe dienaren van noode sijn, soo sal men hare
bewillinghe in ’t affsetten der dienaren ghebruycken, ghelijck
ook van den Synodo verordent is dat men dit in de beroepinghe der
selven doen sal.
Hetselfde sal in de translatie ende oversettinghe der dienaren in
sonderheyt soo sij eewich ofte ymmers lanckdurich is, onderhouden
worden.