Om in diens van die HERE te mag studeer is ´n uitermate groot
voorreg. Enersyds bring verdere studie ´n mens al dieper onder
die indruk van die feit dat die nietige skepsel slegs ten dele
ken (1 Korintiërs 13:12). Andersyds geld die troosvolle woorde
van Spreuke 2:3-5 - “as jy na die insig roep, na die verstand jou
stem verhef, as jy daarna soek soos na silwer en dit naspeur soos
verborge skatte, dan sal jy die vrees van die HERE verstaan en
die kennis van God vind”. Ek dank die HERE van harte vir die krag
wat Hy gee om te kan bly studeer.
Ek is ook dankbaar vir die instrumente wat Hy gebruik het om my
in die studie te lei. Professor A. le R. du Plooy: dankie vir u
voortdurende aanmoediging, raadgewing en leiding. Mevrou Esté
Duvenage in die biblioteek van die Teologiese Skool
Potchefstroom: u vriendelike hulp word besonder waardeer. Aan my
pa, dr. J.G. Meijer, is ek besondere dank verskuldig. Baie ure
van besin en herbesin het my geleer om fyn te luister, presies te
onderskei, eerlik te beoordeel, met respek te verskil as dit
nodig is.
Henriëtte, my vrou: jou bydrae tot die studie is van onskatbare
waarde. Jou voortdurende ondersteuning en jou liefde vir die saak
waaroor dit gaan kan nie gemis word nie. Ons seuns: baie dankie
vir die kinderlik eenvoudige manier waarop julle laat blyk het
dat dit ook vir julle belangrik is dat hierdie groot stuk werk
van Pappa moet klaarkom.
Die Raad vir Geesteswetenskaplike Navorsing en die Gereformeerde
Kerk Pretoria het finansieel gehelp om die wa deur die drif te
trek.
Ten slotte spreek ek graag my innige dank uit teenoor die
Gereformeerde Kerk Ermelo waarvan ons deel is. Die kerkraad het
studieverlof toegestaan om met die werk te kon vorder. Die
gemeente het hulle volle ondersteuning gegee. Heelparty lidmate
het gehelp om die administrasie rondom die afhandeling van die
studie te vergemaklik. Baie dankie daarvoor.
Mag die resultate van hierdie werkstuk daadwerklik bydra tot
voortdurende reformasie van die regering van Christus se kerke
wêreldwyd.
Ermelo, Oktober 1995.