9. In allen kercken sal een boeck sijn in hetwelcke neerstichlick
ende ghetrouwelick de handelinghen die in den kerckenraett
besloten ende met ghemeyner bewillinghe der opteekeninghe werdich
gheachtet sijn, opgheschreven sullen worden, dewelcke men ter
naester versamelinghe telker reyse oplesen sal, opdat men niets
en vergete in het werck te stellen.
Daerbeneven sal in den openbaren kercken noch een ander boeck
sijn daerin de namen derghener die in der ghemeynte ontfanghen
worden, sullen gheschreven sijn. Alsoo ssal men oock
denghenen die ghetrouwt sijn, item de affghestorven
lidtmaten der ghemeynte midtgaders de kinderen die ghedoopt sijn,
de ouderen derselver ende de ghetuyghen hierover ghenomen, oock
mede den tijt op welcken den doop gheschiet is, opschrijven.